News Nineteen
To be known...To be said

കിഫ്ബി മസാല ബോണ്ട് കേസില്‍ മുന്‍ ധനമന്ത്രി തോമസ് ഐസക് ഇന്ന് ഇഡിക്ക് മുമ്പില്‍ ഹാജരാകില്ല

0

കിഫ്ബി മസാല ബോണ്ട് കേസില്‍ മുന്‍ ധനമന്ത്രി തോമസ് ഐസക് ഇന്ന് ഇഡിക്ക് മുമ്പില്‍ ഹാജരാകില്ല. ഇന്ന് രാവിലെ 11 മണിക്ക് കൊച്ചിയിലെ ഇഡി ഓഫീസിലെത്താനായിരുന്നു നിര്‍ദ്ദേശം. ഇത് രണ്ടാം തവണയാണ് ഇഡി നോട്ടീസയച്ചിട്ടും തോമസ് ഐസക് ഹാജരാകാതെയിരിക്കുന്നത്. ഇതിനിടെ കിഫ്ബിയുമായി ബന്ധപ്പെട്ട് ഏത് സാഹചര്യത്തിലാണ് തനിക്ക് നോട്ടീസ് നല്‍കിയതെന്ന ചോദ്യമുയര്‍ത്തി അദ്ദേഹം ഇഡിക്ക് കത്തയച്ചെന്നാണ് വിവരം.

ഇന്നലെ ഇഡി നോട്ടീസിനെതിരെ തോമസ് ഐസക് ഹൈക്കോടതിയെ സമീപിച്ചിരുന്നു. ഇഡി തനിക്കയച്ച രണ്ടു നോട്ടീസുകളിലും ചെയ്ത കുറ്റമെന്തെന്ന് വ്യക്തമാക്കിയിട്ടില്ലെന്നും തനിക്ക് അയച്ച സമന്‍സ് പിന്‍വലിക്കാന്‍ നിര്‍ദേശം നല്‍കണമെന്നുമാവശ്യപ്പെട്ടാണ് കോടതിയെ സമീപിച്ചത്. തുടര്‍ നടപടികള്‍ വിലക്കണമെന്നും ഐസക് ഹര്‍ജിയില്‍ ആവശ്യപ്പെടുന്നു. ഇ ഡി നല്‍കിയ നോട്ടീസില്‍ കിഫ്ബിയോ താനോ ചെയ്ത ഫെമ (FEMA) ലംഘനം എന്താണെന്ന് നിര്‍വചിച്ചിട്ടില്ല. അതുകൊണ്ടു തന്നെ ഇഡിയുടെ സമന്‍സുകള്‍ നിയമവിരുദ്ധമാണ്.  കുറ്റമെന്തെന്ന് വ്യക്തമാക്കാത്ത  അന്വേഷണം ഇഡിയുടെ അധികാര പരിധിക്ക് പുറത്തുള്ളതാണെന്നും ഹര്‍ജിയില്‍ തോമസ് ഐസക് ചൂണ്ടിക്കാട്ടുന്നു.

സര്‍ക്കാര്‍ പദ്ധതികളെ ഇല്ലാതാക്കാനുള്ള ശ്രമങ്ങളാണ് ഇതിനു പിന്നിലെന്നും കിഫ്ബിക്കെതിരായ ഇഡി നീക്കം ഇതിന്റെ ഭാഗമാണെന്നും ഹര്‍ജിയില്‍ ആരോപിക്കുന്നുണ്ട്. കിഫ്ബിക്ക് പണ സമാഹരണത്തിനായി വിദേശ ഫണ്ട്  സ്വീകരിച്ചതലടക്കം കേന്ദ്ര സര്‍ക്കാര്‍ മാനദണ്ഡങ്ങള്‍ ലംഘിച്ചെന്നാണ് തോമസ് ഐസകിനെതിരായ ആരോപണം. എന്നാല്‍ റിസര്‍വ് ബാങ്ക് ചട്ടങ്ങള്‍ അനുസരിച്ചാണ് പ്രവര്‍ത്തിച്ചതെന്നാണ് ഇക്കാര്യത്തില്‍ ഐസകിന്റെ വിശദീകരണം.

ജൂലൈ 18ന് ഹാജരാകണമെന്ന് ഇഡി നോട്ടീസ് അയച്ചിരുന്നെങ്കിലും മന്ത്രി ഹാജരായിരുന്നില്ല. ഇഡി സമന്‍സ് ലഭിച്ചില്ലെന്നായിരുന്നു അദ്ദേഹത്തിന്റെ ആദ്യ പ്രതികരണമെങ്കിലും പിന്നീട് തനിക്ക് ഉച്ചയ്ക്കു ശേഷം ഇ മെയിലായി നോട്ടീസ് ലഭിച്ചെന്ന് വ്യക്തമാക്കുകയായിരുന്നു. ഇഡി ചില പത്രക്കാര്‍ക്ക് സമന്‍സ് ചോര്‍ത്തി നല്‍കി. ഇഡിക്ക് മുമ്പാകെ ഹാജരാകില്ലെന്നും ഇഎംഎസ് അക്കാദമിയില്‍ മൂന്ന് ക്ലാസുകളുണ്ടെന്നും ഫേസ്ബുക്ക് പോസ്റ്റില്‍ ഐസക് വിശദീകരിച്ചിരുന്നു. കേസില്‍ കിഫ്ബി മുന്‍ സിഇഒ കെ എം എബ്രഹാമിനെ ഇഡി ചോദ്യം ചെയ്തിരുന്നു.

Leave A Reply

Your email address will not be published.